-ਖੇਤਾਂ ‘ਚ ਕੀਤੀ ਮਿਹਨਤ,ਜ਼ੋਮੈਟੋ ‘ਚ ਵੀ ਕੰਮ ਕੀਤਾ,ਹੁਣ ‘ਮਾਂ’ ਗੀਤ ਤੋਂ ਮਿਲੀ ਨਵੀਂ ਪਛਾਣ
-ਆਵਾਜ਼ ਪੰਜਾਬ ਦ ਸਿੰਗਿੰਗ ਸ਼ੋਅ ਦੇ ਸੈਕਿੰਡ ਰਨਰ ਅੱਪ ਰਹੇ ਗੁਰੀ ਖੋਸਾ ਦਾ ਗੀਤ ਮਾਂ ਰਿਲੀਜ਼
ਮੋਹਾਲੀ,02 ਅਕਤੂਬਰ, (ਹਰਪ੍ਰੀਤ ਸਿੰਘ ਜੱਸੋਵਾਲ):- ਕਹਿੰਦੇ ਹਨ ਕਿ ਜੇਕਰ ਸੱਚੇ ਮਨ ਨਾਲ ਮਿਹਨਤ ਕੀਤੀ ਜਾਵੇ ਤਾਂ ਸਫਲਤਾ ਦੇ ਸਾਰੇ ਰਸਤੇ ਆਪਣੇ ਆਪ ਖੁੱਲ੍ਹ ਜਾਂਦੇ ਹਨ। ਅਜਿਹਾ ਹੀ ਕੁਝ ਹੋਇਆ ਗਾਇਕ ਗੁਰੀ ਖੋਸਾ ਨਾਲ, ਜੋ ਆਵਾਜ਼ ਪੰਜਾਬ ਦ ਸਿੰਗਿੰਗ ਸ਼ੋਅ ਦੇ ਦੂਜੇ ਰਨਰ-ਅੱਪ ਸਨ। ਦਰਅਸਲ, ਗਾਇਕ ਗੁਰੀ ਖੋਸਾ ਦਾ ਸਿੰਗਲ ਟਰੈਕ ”ਮਾਂ” ਸੋਮਵਾਰ ਨੂੰ ਮੁਹਾਲੀ ਦੇ ਸੈਕਟਰ 71 ਵਿੱਚ ਰਿਲੀਜ਼ ਹੋਇਆ। ਇਸ ਗੀਤ ਨੂੰ ਵਾਇਟਲ ਰਿਕਾਰਡਜ਼ ਦੇ ਬੈਨਰ ਹੇਠ ਰਿਲੀਜ਼ ਕੀਤਾ ਗਿਆ ਹੈ ਅਤੇ ਇਸ ਗੀਤ ਦਾ ਮਿਊਜ਼ਿਕ ਪਾਰਥ ਕਟਾਰੀਆ ਨੇ ਦਿੱਤਾ ਹੈ ਜੋ ਕੇ-ਬਿਟਸ ਮਿਊਜ਼ਿਕ ਕੰਪਨੀ ਚਲਾਉਂਦੇ ਹਨ।
ਇਸ ਗੀਤ ਵਿੱਚ ਮੁੱਖ ਮਾਡਲ ਦੀ ਭੂਮਿਕਾ ਅਰਸ਼ ਨਾਗਰਾ ਨੇ ਨਿਭਾਈ ਹੈ ਜਦਕਿ ਗੀਤ ਵਿੱਚ ਮਾਂ ਦੀ ਭੂਮਿਕਾ ਪੰਜਾਬੀ ਅਦਾਕਾਰ ਰਾਜ ਧਾਲੀਵਾਲ ਨੇ ਨਿਭਾਈ ਹੈ। ਵਾਈਟਲ ਰਿਕਾਰਡਸ ਅਤੇ MH1 ਦੀ ਨਿਗਰਾਨੀ ਹੇਠ ਸ਼ੂਟ ਕੀਤਾ ਗਿਆ ਇਹ ਗੀਤ ਮਾਂ ਅਤੇ ਪੁੱਤਰ ਦੀ ਕਹਾਣੀ ਨੂੰ ਦਰਸਾਉਂਦਾ ਹੈ। ਇਸ ਗੀਤ ਰਿਲੀਜ਼ ਪ੍ਰੋਗਰਾਮ ਦੌਰਾਨ ਵਾਇਟਲ ਰਿਕਾਰਡਜ਼ ਦੇ ਐਮਡੀ ਅਤੇ ਗੀਤ ਨਿਰਮਾਤਾ ਤਲਜਿੰਦਰ ਸਿੰਘ ਨਾਗਰਾ, ਪੰਜਾਬੀ ਗਾਇਕ ਤੇ ਅਦਾਕਾਰ ਹਰਦੀਪ ਗਿੱਲ, ਦਰਸ਼ਨ ਔਲਖ, ਸੰਤੋਸ਼ ਕਟਾਰੀਆ ਅਤੇ ਪੰਜਾਬੀ ਸੰਗੀਤ ਅਤੇ ਫ਼ਿਲਮ ਇੰਡਸਟਰੀ ਨਾਲ ਸਬੰਧਤ ਹੋਰ ਸ਼ਖ਼ਸੀਅਤਾਂ ਹਾਜ਼ਰ ਸਨ।
ਕੁਝ ਸਮੇਂ ਲਈ ਤਾਂ ਅਜਿਹਾ ਲੱਗਦਾ ਸੀ ਕਿ ਸਭ ਕੁਝ ਖਤਮ ਹੋ ਗਿਆ
ਆਪਣੇ ਸਫ਼ਰ ਬਾਰੇ ਗੱਲ ਕਰਦਿਆਂ ਗਾਇਕ ਗੁਰੀ ਖੋਸਾ ਨੇ ਕਿਹਾ ਕਿ ਉਨ੍ਹਾਂ ਦਾ ਸਫ਼ਰ ਉਤਰਾਅ-ਚੜ੍ਹਾਅ ਵਾਲਾ ਰਿਹਾ ਹੈ। ਉਸਨੇ ਆਪਣੇ ਉਸਤਾਦ ਮੌਨੀ ਸ਼ਰਮਾ ਤੋਂ ਗਾਇਕੀ ਦੀ ਸਿਖਲਾਈ ਲਈ। ਇਸ ਤੋਂ ਬਾਅਦ ਉਸ ਨੇ ਪੰਜਾਬੀ ਸਿੰਗਿੰਗ ਰਿਐਲਿਟੀ ਸ਼ੋਅ ਆਵਾਜ਼ ਪੰਜਾਬ ਦੀ ਵਿੱਚ ਹਿੱਸਾ ਲਿਆ ਅਤੇ ਉੱਥੇ ਵੀ ਸੈਕਿੰਡ ਰਨਰ ਅੱਪ ਚੁਣਿਆ ਗਿਆ। ਪਰ ਉਸ ਤੋਂ ਬਾਅਦ ਉਸ ਨੂੰ ਕਿਧਰੇ ਵੀ ਕੰਮ ਨਹੀਂ ਮਿਲਿਆ ਅਤੇ ਉਹ ਆਪਣੇ ਖੇਤਾਂ ਵਿੱਚ ਸਖ਼ਤ ਮਿਹਨਤ ਕਰਨ ਲਈ ਮਜਬੂਰ ਹੋ ਗਿਆ।
ਕੁਝ ਸਮੇਂ ਬਾਅਦ, ਆਰਥਿਕ ਤੰਗੀ ਕਾਰਨ, ਉਸਨੇ ਜ਼ੋਮੈਟੋ ਵਿਚ ਇੱਕ ਡਿਲੀਵਰੀ ਬੁਆਏ ਵਜੋਂ ਵੀ ਕੰਮ ਕੀਤਾ। ਇਸ ਦੌਰਾਨ ਉਸ ਦੀ ਮੁਲਾਕਾਤ ਅਰਸ਼ ਨਾਗਰਾ ਨਾਲ ਹੋਈ। ਅਰਸ਼ ਨੇ ਉਸ ਨੂੰ ਤਲਜਿੰਦਰ ਨਾਗਰਾ ਨਾਲ ਮਿਲਾਇਆ। ਫਿਰ ਉਸਨੂੰ ਵਾਈਟਲ ਰਿਕਾਰਡਸ ਦੁਆਰਾ ਇੱਕ ਮੌਕਾ ਦਿੱਤਾ ਗਿਆ। ਸਭ ਤੋਂ ਪਹਿਲਾਂ ਉਸ ਨੇ ਆਪਣੇ ਲਿਖੇ ਗੀਤ ਮਾਂ ਨੂੰ ਰਿਲੀਜ਼ ਕਰਨ ਦੀ ਇੱਛਾ ਪ੍ਰਗਟਾਈ ਸੀ। ਜੋ ਹੁਣ ਪੂਰਾ ਹੋ ਗਿਆ ਹੈ।
